रास्ता नाट्य वा स्ट्रीट प्ले हो पारंपारीक लोकनाट्याचो आधुनिक नाट्य -अविश्कार.आदी गांवां गांवांनी फेस्ता परबे-वेळार जागोर जाताले.ते उकत्या मांडार जातालें.माची लागनासली आनी मायक वा उजवाडा येवजण नासताली.चारूय वटांनी लोक आनी मदीं नाट्य सादर करताले.तशेंच ‘खेळ’ होय एक तसोच प्रकार.पुण जागोर हो थारायल्ल्या जाग्यार जातालो.रास्ता नाट्य हो एका सुवातेवयल्यान दुसऱ्या सुवातेर जातालो.ताका मांड लागना ,थारायल्ली सुवात लागना, लागता तो फक्त लोक वा प्रेक्षक.नाटक माच्येर जाता,थेटरांत जाता.रास्ता नाट्याक कोणाकुच थेटरांत वचपाची गरज ना.रास्ता नाट्य सगळे भौसांखातीर आसता.मुखेल म्हणजे उजवाडा येवजण वा मायक, प्रोप्सांची व्हडलीशी गरज लागना.आवाज व्हड आसप गरजेचें.तशेंच गोंयची जी मुखेल अशीं वाद्या आसात घुमट,शमेळ,धोल -तासो हांचो वापर जाता.लोकांमदीं जागृताय हाडप हो रास्ता नाट्याचो मुखेल हेतु जावन आसा.खंयच्याय एक समाजीक प्रस्नाचेर वा समस्याचेर बडी मारप आनी लोकांक जागे करप ह्याच कारणाक लागुन रास्ता नाट्य हो प्रभावी थारता.रास्ता नाट्य हो खंयूय जाता.बस स्टेंडार, बाजारांत वा उकत्या मळार.आमचो मुद्दो कितें? लोकांक आमी कितें सांगूक सोदता? हे सामके गरजेचें.रास्ता नाट्य जाता तितल्या वेगान वचूंक जाय,कारण आमचो विशय लोकांमदीं दवरचो पडटा.पथ नाट्याखातीर कांय मुळावी गजाली महात्वाच्यो:
*अभिनय
*शारिरीक लवचीकताय
*आवाजाचेर प्रभुत्व
*पात्रांमदले संयोजन
*सादरीकरण
*मन मुक्त करप
*पात्रां मदलो विश्वास
२०१२-२०१३ ह्या वर्सा आमी मनोविकासाच्या व्यवास्थापकान रास्ता नाट्य सर्त घेवपाचे थारायले.पयल्याच वर्सा इतलो बरो प्रतिसाद मेळ्टलो हाची कल्पना आमका नासली.धोल ताशांच्या गडगडटान, घुमटांच्या आनी झांज शामेळ ह्या वाद्यानी सगळ्यांची काळजां जिंकली.आयज रास्ता नाट्य मनोविकास शाळेचो आत्मो जाला.इल्लोसो जो रोंपो रोयिल्लो ते व्हड झाड जाला ,आनीक कांय वर्सांनी रूख जातलो हांतुत इल्लोय दुबाव ना.
आमी कोंकणी भास मनोविकासांत उखलून धरल्या हाचो आमकां अभिमान .
“कोंकणी आमची भास
गोंय आमचो गांव
गोंयच्या शारांत आमी
गोंयकार जावन आसात”
हे आमी खरें करुन दाखयला.ह्याचखातीर आमी कोंकणी मळार वावुरपी साहित्यीक,कवी,लेखक, नाटककार हांकां आमचे सर्तींचे परिक्षण आनी मुखेल सोयरे म्हुण निमंत्रीत करतात.
लेखिका हेमा बाय नायक,बाब संदेश प्रभु देसाय,बाब साईश पाणंदीकर,बाब प्रशांत नायक, तियात्रिस्त सर्गेस्त अनील कुमार, चित्रकार आनी बरोवपी श्री श्रीधर कामत बांबोळकार,बाब युगांक नायक, सर्गेस्त बाब नित्यानंद नायक आदी हांणी आमच्या शाळेच्या प्रांगणांत पावल दवरलें हाजी आमका खोशी जाता.दर एकल्यान आमच्या रास्ता नाट्य आनी आयजोनाची इतली तोखणाय केल्या कि आमकां उतरांच कमी पडटात.
ह्या वर्सा आमी कोंकणी भाशेंचे अस्तित्व सांबाळुन दवरपी “तियात्र” ह्या गोंयच्या नाट्य प्रकारां माध्यामावरवीं कॉमेडीयन तियात्रिस्त बाब जॉन डिसिल्वा हे मुखेल सोयरे म्हुण हाजीर आसले आपली सगळीं कामां कुशीक दवरुन ते येवंक तयार जाली ह्या खातीर आमी तांच्या उपकारांत.तशेंच परिक्षक म्हुण तियात्रिस्त बाय चित्रा आफांसो,बाब अंथनी सॅन, तशेंच नाटकांवरवी कोंकणी माची गाजोवपी बाब लक्ष्मण परब हाजीर आसले.हाणीय आमच्या उतरांक मान दिवन आमच्या आमंत्रणाक हयकार दिलो ह्या खातीर आमी तांच्याय उपकारात.सुमार गोंयभरची चवदा शाळां सर्तींत वांटेकार जाल्ली हाजी आमकां खोस भोगता. ह्या वर्साचे रास्ता नाट्याचे विशय आसले:
१) हाय रे हाय म्हारगाय
२) म्हजें ? कांय तुजे गोंय?
३) ओन्लायन – ऑफलायन
सुरवेक मानेस्तांक आमच्या गोंयच्या पध्दतीन फुलांचो हार आनी आरती ओवाळुन येवकार दिलो.आमचे शाळेचे चैर्मन श्री जोस मानुएल नोरोन्हा ,डायरेक्टर मायलीन नोरोन्हा, प्रिंसिपल मारिया नोरमन, पल्लवी बुयांव, ब्रेंडा भंडारी,मुखेल सोयरे तियात्रिस्त बाब जॉन डिसिल्वा,परिक्षक बाय चित्रा आफांसो,बाब अंथनी सॅन,बाब लक्ष्मण परब हाणी दिवली पेटोवन सुवाळ्यांची नांदी घाली.मुज्कांच्या तालार मानेस्तांनी बसका घेतली.”खोशयेन उरबेन गायता आमी गोंयां तुजे गीत”, तशेंच “देवा म्हज्या देवा” ह्या गितांनी सगळ्यांची मनां जिंकली.सर्गेस्त श्री उल्हास बुयांव हांचे “यो गों तु मांडार” ह्या गितांच्या तालार सोबीत अशा नाचान प्रेक्षकांक मंत्रमुग्द करुन सोडले.टिचर शेली आनी टिचर पुरबाच्या यत्नांची तोखणाय.आमचे चैरमेन श्री जोस मानुएल नोरोन्हा हांणी येवकारा उलोवप केले.परिक्षकांची वळख करुन दिवन तांकां फळां पांटुल्यान येवकारले.तशेंच बाय सान्वीन मुखेल सोयरे भौमानेस्त श्री जॉन डिसिल्वा हांची वळख करुन दिवन तशेंच तांकां फळां पांटुल्यान येवकारले.ह्या वेळार बाब जॉन डिसिल्वाचे उलोवप जाले, ताणी आपले मन उक्ते करताना आमच्या शाळेची तोखणाय केली.सर्तीचे नेम आमचे सर अक्षय बोरकारान वाचुन दाखयले.आनी उप्रांत सर्तींक सुरवात जाली.सुमार चवदा शाळेनी ह्या सर्तींत वांटेकार जाले.मदीं थोडो ब्रेक घेतलो तेन्ना कांतारां , गितां आनी बँड वाजोवन प्रेक्षकांची करमणुक केली.बाब मायकल,जोन,सलोनी,एलिसिया,सायरस,आनी हेरांनी आपल्या आवाजातल्यान सगळ्यांची मनां जिंकली. बँड हो मनोविकासाचो जीव सर रेविलनोच्या बँडाची तोखणाय सगळ्यांनी केली. उपकारा उलोवप शिक्षिका वेनीफा तावारीसान केले.ह्या वेळार परिक्षकांनी आमकां मार्गदर्शन केले आनी ह्या सर्तींचो निकाल बाय चित्रा आफांसो हाणें जाहीर केलो.पयले इनाम फावो जालें राजमाता पदमती राजे सौंदेकार हायस्कूल फोंडा.दुसरे इनाम निराकार हायस्कूल, काणकोण.तिसरे इनाम मनोविकास इंग्लीश मिडीयम हायस्कूल मडगांव.उमेद वाडोवपी इनामां तुडल हायस्कूल काणकोण, सँट झेवियर हायस्कूल कुडतरी,उत्कर्श विद्यामंदीर हायस्कूल फोंडा हांकां फावो जाली.उत्कृश्ट संहिता निराकार हायस्कूल काणकोण तशेंच उत्कृश्ट घोषणा राजमाता पदमती राजे सौंदेकार हायस्कूल हांकां फावो जालें.